மகளிர் நாள் சிந்தனைகள்

உலக மகளிர் நாள் சிந்தனைகள்.

பெண்ணிற் பெருந்தக்க யாவுள -- திருக்குறள்.

மங்கையராக்ப் பிறப்பதற்கே நல்ல

 மாதவம் செய்திடல் வேண்டும் அம்மா- கவிமணி

ஆணும் பெண்ணும் நிகரெனக் கொள்வதால் 

அறிவிலோங்கி இவ்வையம் தழைக்குமாம்

பெண்கள் அறிவை வளர்த்தால வையம்

 பேதைமை அற்றிடும் காணீர்

பெண்ணுக்கு விடுதலை நீர்இல்லையென்றால்
பின்னிந்த உலகினில் வாழ்க்கையில்லை. -- பாரதியார்.

பெண்ணடிமை தீருமட்டும் பேசுந்திருநாட்டு
மண்ணடிமை தீர்ந்து வருதல் முயற்கொம்பே.

புல்லென்றே நினைக்கின்றீர் மனைவிமாரைப்
புருஷர்களின் உபயோகம் பெரிதென்கின்றீர்
வல்லவன் பே ரறிஞன்ஷா வார்த்தை கேட்டீர்
மனோபாவம் இனியேனும் திருந்த வேண்டும்
இல்லையெனில் ஏதுசெயலாம்? பெண்ஆண் என்ற
இரண்டுருளை யால் நடக்கும் இன்பவாழ்க்கை. --பாரதிதாசன்.

பெண்கள் முன்னேற அவர்கள் கைகளில் இருக்கும் கரண்டிகளைப்

பிடுங்கிவிட்டுப் புத்தகங்களைக் கொடுங்கள் - பெரியார்.

என்பவையெல்லாம் மகளிர் பெருமை பேசும் சான்றோர் மொழிகள்.

ஆம் அவர்கள் கண்ட கனவு நனவாகியுள்ளது.

கடந்த நூற்றாண்டி்ல் இருந்ததைவிட இந்த 21ஆம் நூற்றாண்டில் மகளிர் அதிக விழுக்காடு கல்வியில் முன்னேறி இருக்கிறார்கள்.

வீட்டுக்குள் அடைபட்டுக் கிடந்த பெண்கள் இன்று விண்ணிலேறி சாதனை படைக்கிறார்கள்.

அனைத்துத் துறைகளிலும் மகளிர் ஆடவர்க்கு ஈடாகப் பணிபுரிந்து பொருளீட்டுகிறார்கள்.

முன்பைவிட சமூகப் பிரச்சனைகளில் அதிகமாக ஈடுபட்டு, அநீதிகளுக்கு எதிராகப் போராட்டக் களங்களைச் சந்திக்கிறார்கள்.

ஆனாலும் அவர்களை ஏதோ ஒரு சக்தி இன்னும் பின்னுக்கு

இழுத்துக் கொண்டிருப்பதை நடப்பியல் நமக்கு நன்றாக உணர்த்துகிறது.

எது அது?

தங்களின் முன்னேற்றத்திற்கு முட்டுக்கட்டையாய் இருக்கும்  

தடைகளைத் தகர்க்க, பெரும்பாலான் பாமரப் பெண்கள் 

விதியை நொந்து கொள்வதும், ஆன்மீக வேண்டுதல்களில் ஈடுபட்டுக் 

கடவுள்மீது பாரத்தைப் போட்டுவிட்டு வாளாதிருப்பதுமே 

அந்த முட்டுக்கட்டையாக நான் கருதுகிறேன்.

அறிவை விரிவு செய் அகண்டமாக்கு என்ற பாவேந்தர் நெறியையும்,

அறிவு அற்றம் காக்கும் கருவி, அதைச் சென்ற இடத்தால் செலவிடாது 

நன்றின்பால் செலுத்தலே ஆக்கம் தரும் என்ற குறள் நெறியையும்  பின்பற்றி, மூடநம்பிக்கைகளை விட்டு பகுத்தறிவின் வழி சிந்தித்துச் செயல்படும் மகளிரின் விழுக்காடு உயர்ந்தால் பெண்டிர் பேதைமை அகன்று அறிவிலோங்கி இவ்வையம் தழைக்கும் என்பதே இந்த மகளிர் நாள் சிந்தனையாக எனக்குத் தோன்றுகிறது.

மகளிர் மனத்திட்பமே மாற்றங்களின் வினைத்திட்பமாம்.

பாவலர் பொன்.க.

பழகிய நட்பு எவன் செய்யும்?

நண்பர்கள்.... நண்பர்கள்... நண்பர்கள்.
ஆம் நண்பர்களே இல்லாத மனிதர்கள் இப்புவியில் இல்லை எனலாம்.

அப்படி  நண்பர்கள் யாருமே  இல்லாத மனிதர்கள் நடைப்பிணத்திற்கு ஒப்பாவார்.
அதனால்தான் “ நட்புப் போல் இவ்வுலகில்  செய்தற்கு அரியது ஏதும் இல்லை“ என்கிறது தமிழ்மறை.

பிறப்பிலிருந்து இறப்பு வரை ஒவ்வொருவரும் ஏதோ ஒரு வகையில் நண்பர்களைப் பெற்றிருப்பர். அந்த நண்பர்களில் சிலர் தொடர்வண்டிப் பயண நட்பினராக இருக்கலாம். சிலர் விளையாட்டுக்கள நண்பர்களாக இருக்கலாம்.  சிலர் பணியிட நண்பர்களாகவும்  சிலர் இலக்கிய வட்ட நண்பர்களாகவும், சிலர் சமூகச் சேவையில் இணைந்தவர்களாகவும், இன்னும் சிலர் அரசியல் நட்பு வட்டத்தினராகவும் இருக்கலாம். 

ஆனால் ஒரு சிலரே குடும்ப நண்பர்களாகத் தொடர்ந்து பலகாலம் இருப்பர்.

நட்புக்குப் பலகாலப்  பழக்கம் தேவை என்பதில்லை. 
அடிக்கடி தொடர்ந்து பேசிக்கொண்டே இருக்க வேண்டும் என்பதுமில்லை. 
 நேரில் பார்த்துப் பழகாமலேயே கோப்பெருஞ்சோழனின் பண்பு நலனறிந்து  அவன் இறந்த பின்னர்  அவனது புதைகுழியருகே தானும் வடக்கிருந்து உயிர்நீத்த பிசிராந்தையார் போன்ற காலத்தால் அழியா நட்பினரும் இருந்திருக்கின்றனர்.

அதனால்தான்  “நட்பிற் குறுப்புக் கெழுதகைமை“  என்கிறார் வள்ளுவர் பெருந்தகை. அவரே எது நட்பு என்னும் வினாவிற்கு  “முகம் இனிக்கப் பழகுவது நட்பாகாது, மனம் இனிக்கப் பழகுவதே நட்பு“  என விடை பகர்ந்திருக்கிறார்.
எவ்வகையானும் பெற்ற தொடர்பினை முறித்துக் கொள்ளாமல் தொடர்வதே நல்ல நட்பாக இருக்க முடியும்.

நல்ல நட்பு  வளர்பிறைபோல நாளும் வளரும். பண்புடையவர் நட்பு படிக்கப்படிக்கத் தெவிட்டாத நூலின்பம் போலும் என்பது வள்ளுவர் வாய்மொழிகளே.

நாம் சிரிக்கும்போது சிரிப்பவர்கள் மட்டும் நல்ல நட்பினர் அல்லர்.
 நாம் துயருறும்போது நம் கண்ணீரைத் துடைப்பவரே சிறந்த நட்பினர்  ஆவர்.

உடுக்கை இழந்தபோது உடன் விரைந்து செயல்படும் கைகளைப்போல நட்பினரின் செயல் அமைதல் வேண்டும் என்றும்  உரிமையோடு ஒருவர்க்கு நல்லன செய்தலே சிறந்த நட்பு என  நட்பின் சிறப்புகளை திருக்குறளின் பொருட்பாலில் அய்ந்து அதிகாரங்களில் அழகுபடக் கூறியுள்ளார்.
 ஒருவரின் பிறப்பு, இனம், மொழி, பொருளாதாரம் முதலான நிலைகளால் வேறுபடாமல் முடிந்தவரை அவரைத் தாங்கி நிற்பதே நட்பின் உயர்நிலை என்பதும் வள்ளுவமே.

ஆனால் இன்றைய மின்னணு உலக இயக்கத்தில்  நட்பு என்பது வெறும் தொடர்வண்டிப் பயண நட்புகளாகவே மாறிக்கொண்டிருப்பது கண்கூடு.
உறவுபோல நடித்து புறம்பேசும்  முகம்நக நட்பதாகவே பல நட்புகள் காணப்படுகின்றன.
“உள்ளொன்று வைத்துப் புறமொன்று பேசும் உறவு கலவாமை வேண்டும்“ என இதைத்தான் கூறினரோ?

ஒருவரால் பயன் கிட்டும்வரை அவரைப் புகழ்வதும், அவரின் பயன் அருகிப் போகுங்கால் அவரைப் பிரிவதும் இகழ்வதுமாக நடப்பியலில் நட்பு சிதைவுற்றுப் போயுள்ளது.

பெரிதும் போற்றற்குரிய பண்பாளர்கள். தொண்டாளர்கள் எல்லாம் அவர்கள் வாழ்ந்த காலத்துப் புகழப்படாமல் அவர்களின் மறைவுக்குப் பின்னரே அவர்களின் நண்பர்களால் குடும்ப நிதி அளிக்கப்பட்டும் ,புகழஞ்சலி செலுத்தப்பட்டும், நினைவிடங்கள் உருவாக்கப்பட்டும், அறக்கட்டளைகள் அமைக்கப்பட்டும் வரும் நிலைகளை நோக்க
 “பழகிய நட்பெவன் செய்யும் கெழுதகைமை
 செய்தாங்கு அமையாக் கடை”  என்னும்  குறள் நெறி  பொய்த்துப் போயிற்றோ என எண்ணத்தான் தோன்றுகிறது.

இன்னும் சிலர் பழகிய நண்பர் கெடுவாய்ப்பால் பழிச்சொல்லுக்குள்ளாகும் போதோ, திட்டமிட்டு  அவதூறுகளால் அவரின் நற்பெயருக்குக் களங்கம் ஏற்படும்போதோ அவரோடு கொண்டிருந்த நட்பினை விலக்கிக் கொள்கின்றனர். அவரைத் தனது நண்பர் இல்லை என்று ஒதுங்கிக் கொள்வதும், அவரோடு பேசுவதையே இழிவென்று அவரைப் புறக்கணிப்பதும் பரவலாகக் காணப்படுகிறது. 

இன்னும் சிலர் அதுவரை அவர்மீது கொண்டிருந்த நல்லெண்ணங்களுக்கு மாறான செயல்பாடுகளை மேற்கொள்வதும், பின்னாளில் அவர்மீதான அவதூறு பொய்யென்றாகும்போது அவரைத் தேடி நட்புக் கொள்ள முயல்வதும்  இன்றைய சந்தர்ப்பவாத அரசியல்வாதிகளையே நினைவு படுத்துகிறது.

ஆராய்ந்து நட்பு கொள்ளுதலும், நட்பு கொண்டபின்னர் அவரை இகழாது   நல்லது கெட்டது அனைத்திலும் அவரைப் பிரியாது துணை நிற்றலுமே நல்ல நட்பினர்க்கான அடையாளங்களாகும்.

எனவே தாமரை இலைத் தண்ணீராக இல்லாது, அக்குளத்து  நீரற்ற காலததும் அகலாதிருக்கும் கொட்டியும் தாமரைக் கிழங்குகளுமாய் நட்பினைத் ்தொடர்வோம். அதுவே தமிழர் பண்பாடு.

திருப்புக தேரை - மின்னூலாகியது.

•  
   
   
 
• 
 
•  All
 
 
•  Login

• Home
• Blogs
• eBooks
• eMagazines
• Authors
• Plans
• 
• 



புலவர் பொன்.கருப்பையா  (Pulavar Pon. Karuppiah)

New

Pulavar Pon. Karuppiah

Blog: http://pudugaimanimandram.blogspot.in/

About the author

மிக சிறந்த தமிழாசிரியாரக 36 ஆண்டுகள் பணி புரிந்த இவர், பல்வேறு துறைகளில் புலமை பெற்றவர். இவரின் எண்னிலடங்கா ஈடுபாடுகள் - எழுத்தாளர், நாடக இயக்குநர். பாடலாசிரியர், வில்லிசைக் கலைஞர், இசையமைப்பாளர், பாடகர், ஒப்பனையாளர், இலக்கிய ஆர்வலர், சமூக சேவையாளர், ஊர்க்காவல்படைப்பிரிவு தளபதி என நீண்ட பட்டியல் கொண்டது. இவர், 72 சிறு, குறு நாடகங்கள், 450 இசைப்பாடல்கள், 7 தலைப்புகளில் வில்லுப்பாட்டு, பொதுஅறிவு, இலக்கிய நாடகங்கள் என பல படைப்புகளைப் படைத்துள்ளார். தமிழக நல்லாசிரியர் விருது, பல்துறைக் கலைஞர் விருது, ஆசிரிய மாமணி விருது, நாடகக் கலைமணி விருது என பல விருதுகளைப் பெற்றுள்ளார்.

MORE BOOKS FROM THE AUTHOR - புலவர் பொன்.கருப்பையா  (Pulavar Pon. Karuppiah)

New

Thiruppuga Therai…

Author: Pulavar Pon. Karuppiah

Category: Historical

 50.00 / $ 1.99

Be first to Write Review

Buy Now

Rent Now

Subscription

Register now to get updates on promotions and coupons

Help

• How it works
• FAQ
• Android App
• Library
• Plans
• Buy

Pustaka

• Contact Us
• About Us
• Press
• Blogs

Misc

• Sitemap
• Disclaimer
• Privacy Policy
• Terms & Conditions
• 
• 
• 
• 

 
 
 
• © 2016 Pustaka Digital Media Pvt. Ltd., India

Back To Top

பண்பாடு காக்கும் தாய்மொழி

மனிதக் கண்டுபிடிப்புகளிலேயே  மகத்தானது மொழிதான். தாய் வழியாகத் தன் பிள்ளைகளுக்கு ஊட்டப்படுவதே தாய்மொழியாகும். 
பேச, எழுத, சிந்திக்க, எண்ணங்களைப் பகிர்ந்து கொள்ள உதவும் சிறந்ததொரு கருவி தாய்மொழியேயாகும்.

மொழி தோன்றிய காலம் தொட்டே உலகில் பல்லாயிரக்கணக்கான மொழிகள் பேசப்பட்டு வருகின்றன. சில மொழிகள் வரிவடிவமற்றும், பலமொழிகள் தொடர்ந்து மக்களால் பேசப்படாமையாலும் வழக்கொழிந்து மறைந்து வருகின்றன. 

இந்நிலை நீடித்தால் இன்னும் சில ஆண்டுகளில் இரண்டாயிரத்துக்கு மேற்பட்ட மொழிகள் இல்லாமல் போய்விடுமோ என மொழியியல் ஆய்வாளர்கள் அஞ்சுகின்றனர்.

நமது இந்தியத்திருநாட்டில்  ஆயிரத்து அறுநூற்றுக்கு மேற்பட்ட மொழிகள் பல இனத்தவரால் பேசப்பட்டு வருவதாகப் புள்ளிவிவரங்கள் கூறுகின்றன. மக்கள் பேசும் தாய்மொழியின் வழியிலேயே  அந்தந்தப் பகுதிமக்களின் பண்பாடு கலாச்சாரம் கட்டமைக்கப்பட்டு உள்ளது.

உலகில் தோன்றிய பெருமொழிகளில் மூவாயிரமாண்டு தொன்மை வாய்ந்தது நம் தமிழ்மொழி. தமிழ்நாட்டில் மட்டுமல்லாது இந்திய அளவிலும் வங்க மொழிக்கு அடுத்ததாக பேசப்பட்டும் , இலக்கிய வளமையுடனும்  இருக்கும் மொழி தமிழ்மொழி  என மொழியியல் வல்லுநர்கள் கருத்திடுகின்றனர்.

தமிழகத்தின் ஆட்சிமொழியாகத் தமிழ் விளங்குகிறது. சிங்கையின் ஆட்சி மொழிகளில் ஒன்றாகத் தமிழ் உள்ளது. இன்னும் இலங்கை, மலேசியா, அமெரிக்கா. கனடா, நார்வே,  செர்மனி, பிரான்சு, மொரீசியசு, தென்னாப்பிரிகா, ஆசுதிரேலியா போன்ற உலக நாடுகளிலும் தமிழைத்தாய் மொழியாகக் கொண்டவர்கள் வாழ்கிறார்கள்.  புலம்பெயர்ந்த இந்திய, இலங்கைத் தமிழர்களால்  தமிழ் சர்வதேச மொழியாக்கப்பட்டுள்ளது நமக்குப் பெருமைதான்.

தொன்மை, மென்மை, இனிமை,தனித்தியங்கும் தன்மை, இலக்கிய வளம் முதலான  பதினோரு கூறுகளால்  உயர்தனிச் செம்மொழி எனும் பெருமை பெற்றுள்ளது நம் தாய்மொழியாம் தமிழ்மொழி.

இத்தகு சீரிளமைத் திறம்வாய்ந்த நம் தாய்மொழி அண்மைக் காலமாக பிறமொழிக் கலப்பால் தன்  தனித்தன்மையை இழந்து வருவது வேதனைக்குரியது.

உலகமயமாக்கல், தாராள வணிகமயம், அந்நிய முதலீடுகள், அயலகப் பொருள்கள் மீதான மக்கள் மோகம் முதலிய காரணிகளால்  தமிழைத் தாய்மொழியாகக் கொண்ட தமிழ் மக்கள் அயல்மொழி கலப்போடு பேசத்தொடங்கிவிட்டனர்.

இன்னும் மக்களை ஈர்க்கும் பெருவெளி ஊடகங்களும், சின்னத்திரை வண்ணத்திரை உரையாடல்களும் விளம்பரங்களும் தமிழ்மொழிச் சிதைவிற்கு பெரும் பங்காற்றுவது சொல்லொணாத் துயரம்.  

இந்தநிலை இப்படியே தொடர்ந்தால் நம்தாய்மொழியாம் தமிழ்மொழி தன் சுயம்பினை இழந்து அழிந்துபடும் நிலைக்கும் தள்ளப்பட்டுவிடும். அதன் விளைவு  மூத்த பெருங்குடியாகிய தமிழினம் காலப்போக்கில் இல்லாமலே போகுமோ என்ற அச்சமும் ஏற்படுகிறது.

நாம் என்ன செய்ய வேண்டும்?

நம் தாய்மொழி தமிழைப்   பிறமொழிக் கலப்பின்றிப் பேச வேண்டும்.
தாய்மொழி வழியிலேயே சிந்திக்க வேண்டும்.
படைப்புகளை பிறமொழிக் கலப்பின்றி எழுத, பேச வேண்டும்.
 தமிழிலேயே கையெழுத்திடவும், முன்னெழுத்தை தமிழிலும் இட வேண்டும்.
படைப்பாளிகள் தமிழ் மொழியின் சிறப்புகளை தங்களின் படைப்புகளில் அமைக்க வேண்டும்.
தமிழ்ப் பண்பாட்டுக் கூறுகளை இயன்ற வழிகளில்  பின்பற்றவும் பரப்பவும் வேண்டும்.
தமிழ்ப் பாரம்பரிய விழாக்களைச் சிறப்பாகக் கொண்டாட வேண்டும்.
தமிழ்ப் பாரம்பரிய கலைகளை நிகழ்த்தல் வேண்டும்.
தமிழகப் பாரம்பரிய விளையாட்டுகளை ஊக்குவிக்க வேண்டும்.
தமிழ்க் கலாச்சார உணவுகளையே உண்ண வேண்டும். 
தமிழ்க் கலாச்சார உடைகளையே அணிய வேண்டும்
நம் தமிழிலக்கியங்களையும் படைப்புகளையும் உலகறியச் செய்ய அவற்றை பிறமொழிகளில் பெயர்த்துப் பதிக்க வேண்டும் .

பிறமொழிகளுக்கு நாம் எதிரிகள் இல்லை. நம் தாய்மொழியின் தளர்ச்சிக்கு நாம் காரணமானவர்களாகவும் இல்லை என இந்த உலகத் தாய்மொழிநாளில் ஓர் உறுதி பூணுவோம். 

இணையத் தமிழ்ப் பயிற்சி முகாம்.

புதுக்கோட்டை மவுண்ட்சீயோன் பொறியியல் கல்லூரியில் 18.12.2016 அன்று கணினித் தமிழ்ச் சங்கம் நடத்திய இணையத் தமிழ்ப் பயிற்சி முகமையில் LK Institute of Skill Development  நிறுவனம் தயாரித்து அளித்த கணினித் தமிழ்க் கையேட்டினை கவிஞர் தங்கம் மூர்த்தி வெளியிட அதனை கவிஞர் கீதாவும்ஈ பாவலர் ்பொன்.கருப்பையாவும் பெற்றுக் கொண்டனர்.

முகாம் தொடக்கத்தில்  பாடுவதற்காக பாவலர் பொன்.க எழுதி  இசையமைத்திருந்த பாடல், தொடக்கம்  திட்டமிட்ட  நேரத்தில் தொடங்கப்பட இயலாச் சூழலில் அப்பாடல் தவிர்க்கப்பட்டது. ஆனாலும் அந்தப் பாடல் இதோ...

புதிய பொலிவு பெறுகு தெங்கள் இனிய தமிழ்மொழி
புவியைச் சுருக்கி இணைக்கு திப்போ இணையத் தமிழவழி
கணினித் தமிழ்ச் சங்கம் காட்டும் பயிற்சி  யின்வழி
கடல் கடந்து விண்ணைத் தொடுது கன்னித் தமிழ்மொழி       - புதிய

மின்னஞ்சல் வழியில் செய்தி தமிழில் அனுப்புவோம்
மேன்மையான நடப்பைப் பிறர் அறிய வழங்குவோம்
வலைத் தளங்கள் உருவாக்கி வளமை பெருக்குவோம்
வகைவகை யாய்ப் படைப்பு களை வழங்கி மகிழுவோம்       - புதிய

முக நூலைத் தொடங்கித் தரவைப் பதிவு செய்யலாம்
முனைப் புடனே  செய்திப் படங்கள் ஏற்றிக் காட்டலாம்
நானி  லத்து மனிதர் களையும்  நண்ப  ராக்கலாம் 
நட்பு வட்டத்  தோடு செய்தி பகிர்ந்து கொள்ளலாம்    -- புதிய 

வலை யொளியில் காணொளி நல் காட்சி ஏற்றலாம்
உலகம் முழுதும் பார்த்தவரின் விருப்பமறியலாம்
விக்கி  பீடியாவில் தமிழில் கருத்தை எழுதலாம்
விரும்பும் நூலை பிடிஎப்பில் படித்து மகிழலாம்            - புதிய

திறன்  செயலிப் பேசிகளில் திரட்டி ஏற்று  வோம்
தேவைப் படும் வகையியல திறந்து பயன் படுத்துவோம்
கணினி வழி வன்மு றைகள் பரவுதல் தடுப்போம்
கடவுச் சொல்லை கமுக்க  மாக மூடியே வைப்போம் - புதிய 

இணையத் தமிழ்ப் பயிற்சி முகாம்

புதுக்கோட்டை கணினித்தமிழ்ச்சங்கம் நடத்திய

இணையத்தமிழ்ப்பயிற்சி முகாம்.

மவுண்ட் சியோன் பொறியியல் கல்லூரியில் 18.12.16 அன்று காலை 10 மணியளவில் தொடக்கவிழாவோடு துவங்கியது.

வரவேற்புரை

கவிஞர் ராசிபன்னீர்செல்வன் அவர்கள் வரவேற்புரை நல்கினார்.

[விழா நடக்கும் இடத்திற்கான பொறுப்பு மற்றும் அவர்களே உணவும் தேநீரும் வழங்குவார்கள் என்று கூறி பெரிய நிதிச்சுமையை குறைத்தார் திட்டமிடலின் போது]

வாழ்த்துரை

மவுண்ட் சியோன் பொறியியல் கல்லூரியின் இயக்குநர் திருமிகு ஜெய்சன் ஜெயபரதன் அவர்களும்,கல்லூரியின் முதல்வர் முனைவர் பாலமுருகன் அவர்களும் சிறப்பானதொரு வாழ்த்துரையை வழங்கினார்கள்.

பயிற்சி கையேட்டு நூல் வெளியிட்டு சிறப்புரை

கவிஞர் தங்கம் மூர்த்தி அவர்கள் பயிற்சி கையேட்டு நூலை வெளியிட அதை கணினித்தமிழ்ச்சங்க உறுப்பினர்களாகிய பாவலர் பொன்.கருப்பையா அவர்களும் ,கவிஞர் கீதாவும் பெற்றுக்கொண்டனர்.

சிறப்பானதொரு உரையை கவிஞர் தங்கம்மூர்த்தி வழங்கினார்.

பயிற்சி நோக்கவுரை

கணினித்தமிழ்ச்சங்கத்தின் தோற்றம்...தோற்றுவித்தவர்,ஏன் கணினித்தமிழை வளர்க்க வேண்டும் என கவிஞர் நா.முத்துநிலவன் அவர்கள் விரிவாக எடுத்துரைத்த விதம் அனைவரையும் கவர்ந்தது.ஒவ்வொரு நாளும் தூங்காமல் திட்டமிட்டு அதை வெற்றிகரமாக நடத்தி முடிக்கும் திறமையை பாராட்டாமல் இருக்க முடியாது. 

வாழ்த்துரை வழங்கிய சிறப்பு விருந்தினர்களுக்கு பொன்னாடை அணிவித்து நூல்கள் வழங்கி கௌரவிக்கப்பட்டது.

நன்றியுரை

கவிஞர் கீதா நன்றியுரை கூற தொடக்கவிழா இனிதே நிறைவுற்றது.

பயிற்சி முதல்நிலை

முதல் பயிற்சியாக தொடக்கநிலையில் உள்ளவர்களுக்கு முனைவர் பழனியப்பன் அவர்கள் மற்றும் புதுகை எல்.கே இன்ஸ்டியூட் உதயக்குமார் ஆகியோர் வழங்கினார்கள்.

புதுக்கோட்டை மற்றும் பல மாவட்டங்களில் இருந்து 80 பேருக்குமேல் பயிற்சியில் கலந்து கொண்டனர்.அதில் 40 பேருக்கு மேல் அன்றைய பயிற்சியில் மின்னஞ்சல் துவங்கி, வலைப்பூவும் வடிவமைத்தனர்.

வலைப்பூவை எவ்வாறு மேம்படுத்தலாம் என்று வலைச்சித்தர் திண்டுக்கல் தனபாலன் அவர்கள் தெளிவாக விளக்கினார்கள்.அனைவரும் தங்களது தளத்தை செம்மைப்படுத்திக்கொள்ள உதவினார்.

விக்கிபீடியாவின் அடிப்படை நோக்கம் என்ன?என்ன எழுதாலாம்....அதன் பயன்கள் என்ன என்று விக்கிபீடியாவைச்சேர்ந்த பிரின்ஸ் என்ராசு அவர்கள் தெளிவுபடுத்தினார்கள்.

முனைவர் ஜம்புலிங்கம் அய்யா தனது விக்கிபீடியா அனுபவங்களைக்கூறி எப்படி எழுத வேண்டும் .எதை எழுதக்கூடாது என்பதை கூறி..

பயிற்சியை மெருகூட்ட விக்கிபீடியாவில் கவிஞர் தங்கம் மூர்த்தி அவர்களுக்காக ஒரு கட்டுரை துவங்குகின்றேன் என்று துவங்கினார்கள்.நம்பிக்கைக்குரிய விக்கிபீடியா உறுப்பினராக அய்யா விளங்குகின்றார்..கணினித்தமிழ்ச்சங்கம் அளித்த முதல்பயிற்சியில் தான் அவர்கள் விக்கிபீடியாவைப்பற்றி அறிந்து பின் 300 கட்டுரைகளுக்கு மேல் எழுதியுள்ளார்கள் என்பது குறிப்பிடத்தக்கது.

திருமிகு ரமேசு டி.கொடி திருச்சி

யூ ட்யூபில் எவ்வாறு வீடியோவைப்பகிர்வது என்பதைப்பற்றி சிறப்பாக விளக்கினார்.

அலைபேசி பயன்பாடு

அலைபேசியில் என்னவெல்லாம் பயன்படுத்தலாம் என்பதையும்,கூகுளில் ஷார்ட்கட் முறைகளையும்,திருமிகு கோபிநாத் [ஜி டெக் எஜுகேசன்]அவர்களும் திருமிகு ராஜ்மோகன் அவர்களும் எடுத்துக்கூறியது மிகவும் பயனுள்ளதாக அமைந்தது.

கலந்து கொண்டு சிறப்பித்த வலைப்பதிவர்கள்

திருமிகு கில்லர்ஜி,

திருமிகு எஸ்.பி செந்தில்குமார்,

திருமிகு கோபிசரபோஜி,

திருமிகு தமிழ் இளங்கோ. ....

கவிஞர் செல்வா மற்றும் புதுகை செல்வா ஆகியோர் தங்களது வலைப்பூ அனுபவங்களைப்பகிர்ந்து கொண்டனர்.

கல்லூரி நிர்வாகத்தினர் சிறப்பானதொரு மதிய உணவும் தேநீரும் தந்து உபசரித்த விதம் மிக அருமை.

அனைவரிடமும் கருத்து படிவம் வழங்கி கருத்துகளைப்பெற்றபோது..சிறப்பான பயிற்சி மேலும் வழங்க வேண்டும்,பிறமாவட்டங்களிலும் நடத்த வேண்டும் என அனைவரும் பயன் பெற்றோம் என்று எழுதியிருந்த போது ...அதுவரை பட்ட சிரமங்கள் எல்லாம் பனியாகக்கரைந்தன.

இப்பயிற்சி முழுமையடைய முழுமுதற்காரணம் கவிஞர் முத்துநிலவன் அண்ணா தான்.இரவுபகல் பாராது இதற்காக உழைத்துள்ளார்.அவர்களின் சீரான திட்டமிடலே முக்கிய காரணம்...கணினியில் நிறைய கற்றுக்கொள்ள வேண்டும்..என்ற தாகத்தை அன்றைய பயிற்சி உருவாக்கியுள்ளது.

தமிழன்னை சிந்தும் கண்ணீரைத் துடைக்க..

தமிழன்னை சிந்தும் கண்ணீரைத் துடைக்க...

“தொன்று நிகழ்ந்த தனைத்து முணரந்திடு
சூழ்கலை வாணர்களும் - இவள் 
என்று பிறந்தவள்  என்றுண ராத 
இயல்பின ளாம் எங்கள் தாய்“ --

என்ற பாரதியின் வாக்கிற்கேற்பவும்  

“திங்களொடும் செழும்பரிதி தன்னோடும் 
விண்ணோடும் உடுக்களோடும்
மங்குல்கடல் இவற்றோடும் பிறந்த தமிழ்“ என்ற பாவேந்தர் 

மொழிவிற்கேற்பவும், உலகின் தோன்றிய மொழிகளுக்கெல்லாம் மூத்த,தொன்மை வாய்ந்த மொழியாய்த் தோன்றிய மொழி 
நம் தமிழ்மொழி.

நான்காயிரம் ஆண்டுகளுக்கு முன்னர் இந்தியா முழுதும் பேசப்பட்ட மொழி தமிழ்மொழி என பிரித்தானியா கலைக் களஞ்சியம் சொல்லும் பெருமை கொண்ட மொழி தமிழ்மொழி.
இத்தகு பெருமையும் தனித்தன்மையும் மிக்க தமிழ்மொழியில் காலப்போக்கில் பிறமொழிகள் சிறிது சிறிதாகக் கெடுவாய்ப்பாகக் கலக்கத் தொடங்கின.

மூவாயிரம் ஆண்டுகளுக்கு முன்னர் சமற்கிருதம் போன்ற பிற மொழிச்சொற்கள் சில தொல்காப்பியம், சங்க இலக்கியம், திருக்குறள் போன்ற நம் தமிழ் நூல்களில் வந்து கலந்ததாக வரலாற்றாய்வாளர் கூறுகின்றனர்.         ( திருக்குறளில் வெறும் 17 சொற்களே பிறமொழிச் சொற்கள் என்பார் பாவாணர்)
தமி்ழைப் பிற உலக மொழிகளுடன் ஒப்பிட்டு ஆய்ந்த கால்டுவெல்                        “ தமிழுக்கு அயன்மொழியின் துணை தேவையில்லை. 
பிறமொழிச் சொற்களை விலக்கினாலே தமிழுக்குப் பெருமை மிகும்” என்று குறிப்பிட்டார்.


தமிழக வரலாற்றில் இருண்ட காலம் எனக்கூறப்பட்ட களப்பிரர் காலத்தில் தான் பல  தமிழ் நூல்கள் பிறமொழிக் கலப்போடு புடைத்தெழுந்தன. 
காலச்சூழலில் ஆண்ட மன்னர்களின் பேதைமையாலும் ஆரிய ஆதிக்கம் மிகுந்தது.

அழிவின் விளிம்பில் இருந்த தமிழ்,  அப்பர், சுந்தரர், திருஞான சம்பந்தர், மாணிக்கவாசகர்  காரைக்கால் அம்மையார் போன்றோரின் திருமுறைகளால் ஓரளவு காப்பாற்றப்பட்டது என்றே கூறலாம்.  ஆழ்வார்களின் இறைஇசைப் பாடல்களும்கூட சமற்கிருதத்தைப் புறந்தள்ளியே இருந்ததைக் காணலாம். 

கம்பரும், ஒட்டக்கூத்தரும்  இயன்றவரை பிறமொழிச் சொற்களைத் தவிர்ததே தங்கள் படைப்புகளைத் தந்துள்ளனர். என்றாலும் பல புலவர்கள் பிறமொழிக் கலப்போடே படைப்புகளைத் தந்துள்ளமை வேதனைக்குரியதே.

பல்லவர் காலத்திலும் பின்பெழுந்த  மூவேந்தர் காலத்திலும்  வெறிகொண்ட சமற்கிருத தாக்கம் தமிழில் மிக்கிருந்தது வெள்ளிடைமலை.

 புலவர்களின் புனைவுகள், மன்னர்களின் கீர்த்திக் கல்வெட்டுகள் பிறமொழிக் கலப்போடே காணப்படுகின்றன. 
பிற்காலத்தில் தெலுங்கு கன்னடம், சமற்கிருதம் கலந்த மணிப்பிரவாள நடை தமிழின் தனித் தன்மைக்குப் பெரும் முட்டுக்கட்டையாய் இருந்ததை யாரும் மறுக்க முடியாது.

அயல்நாட்டார் வருகை  காரணத்தால், இனிமைத் தமிழ்மொழி இனந்தெரியாப் பிறமொழிகளின் கலப்பிற்குட்பட்டுச் சிதையத் தொடங்கியது.

குறிப்பாக ஆங்கில, பாரசீக,போர்ச்சுகீசிய மொழிகள் தமிழில் இரண்டறக் கலந்து பேதமின்றி பேச்சு, எழுத்து வழக்கில் நிலைபெறத் தொடங்கிற்று.

பிறமொழிக் கலப்பால் தமிழ்மொழி தன் தனித்தன்மையை இழந்து நாளடைவில் கலப்பு மொழியாகி அழிந்து விடும் என்கிற மொழிக்காப்பு உணர்வில்தான்  மறைமலையடிகள்,  பரிதிமாற்கலைஞர்,தேவநேயப் பாவாணர், பெருஞ்சித்திரனார் போன்றோர் தனித் தமிழ் இயக்கத்தைத் தோற்றுவித்து , தமிழினத்தை ஓர் அறிவுக் குமுகமாக மாற்றி நிலை நிறுத்தும் அரிய பணியினைத் தொடர்ந்தனர்.

கால்டுவெல் , சி.யு.போப், வீரமாமுனிவர் போன்ற் அயலகச் சான்றோரும் தனித் தமிழ் வளர்ச்சிக்கு அரும்பணியாற்றியுள்ளனர்.
தனித்தமிழின் வளர்ச்சிக்கு  தமிழ்த் தென்றல் திரு.வி.க. கி.ஆ.பெ.விசுவநாதன் போன்ற பலரின் இதழியல் தொண்டும் மறக்கவியலாதவை. 

கடந்து நூற்றாண்டின் இணையற்ற பாவலர்கள் பாரதியும் பாரதிதாசனும் தங்களின் படைப்புகளின்வழி தனித்தமிழின் வளர்ச்சிக்குப் பெருந் தொண்டாற்றியுள்ளனர்.

“தாய்ப்பாலில் நஞ்செனவே
தமிழில்வட மொழி சேர்த்தார்
தவிர்த்தல் வேண்டும்.
தமிழ்ப் புலவர் தனித் தமிழில்
நாடகங்கள் படக்கதைகள் 
எழுத வேண்டும்“  எனத் தனது “தமிழியக்க“ நூலில் பாவேந்தர்  பகர்ந்துள்ளது நோக்கத் தக்கது.
தமிழ் வரலாற்றில் முதன்முறையாக வடசொல் ஆட்சிகளைத் தவிர்க்கும உணர்வோடு தனித்தமிழிலேயே எழுதும் முயற்சியில் இலக்கியங்களைப் படைத்த பெரும்பாவலர் பாரதிதாசன் என்று செக்.மொழியறிஞர் கமில்சுவலபில் கூறியுள்ளார் .
ஆனால் இன்று  தமிங்கிலம் தலைதூக்கிய நிலை. சமற்கிருதமும் இந்தியும் தலைமொழிகளாய்ப் புகும் நிலை. 

இப்படிக் காலங்காலமாய்  தமிழில் பிறமொழிக் கலப்பை நோக்குங்கால்        “ மெல்லத் தமிழினி சாகும் என்றந்த பேதை“ சொன்னதுபோல் எங்கே தமிழ்மொழி அழிந்து போகுமோ என்ற கவலையால் தமிழ்த்தாய் கண்ணீர் வடிப்பது  வேதனையளிப்பதாகவே உள்ளது.

இந்நிலை இப்படியே தொடர விடப்போகிறோமா? 
ஒரு மொழி அழியும்போது அம்மொழி பேசும் இனமுமல்லவா அழிந்துபடும்.
“இந்நிலைமாற வேண்டுமெனில்... 
பேச்சில் எழுத்தில்  இதழ்களில் , சின்னத்திரை, வண்ணத்திரை  காட்சி  ஊடகங்களில்,சமூக மின்னணு ஊடகங்களில்., பிறமொழிக் கலப்பில்லாத படைப்புகள் வரத் ்துறைதோரும் பரப்புரை மேற்கொள்வோம்”. 
தேமதுரத் தமிழோசை உலகமெலாம் பரவ,
 “தனித்தமிழ் இயக்கம் தொடர்வோம்” 

பிறமொழிப் பெயர்கள் தவிர்த்து 
“தமிழ்ப் பெயர்களைக் குழந்தைகளுக்குச் சூட்டுவோம்.”

 “தாய்மொழிவழி நம் குழந்தைகளைக் கல்வி கற்கச் செய்வோம்.” தாய்மொழிவழிச் சிந்தனையே பிறமொழி கற்றலுக்கு உதவும் .

“பிறமொழி நூல்களைத் தனித்தமிழில் மொழிபெயர்ப்போம்.”
தனித்தமிழில் பேசுவோம். 
தனித்தமிழ்ப்  படைப்புகளை உருவாக்குவோம். 
 தமிழ்த்தாயின் கண்ணீரைத் துடைப்போம். 
தமிழினம் காப்போம்.